მოქალაქე გიორგი ყურაშვილმა რამდენიმე დღის წინ ფეისბუქზე მობილური ტელეფონით გადაღებული ფოტო გაავრცელა, სადაც ის ქალაქის მერიას, დაზიანებული ქუჩის ურნის შეკეთებისკენ მოუწოდებდა.
აღნიშნული ინფორმაცია და სურათები „თაიმერს“ თავად გიორგი ყურაშვილმა მიაწოდა და დასძინა, რომ ასეთ სწრაფ რეაგირებას თბილისის მერიის და კონკრეტულად მერის, დავით ნარმანიას მხრიდან არ მოელოდა, რამაც სასიამოვნოდ გააოცა.
„ბატონო დავით ნარმანია და თბილისის მერია, სისუფთავისთვის მხოლოდ ჯარიმებით ხალხის დაშინება არ კმარა. ურნებიც საჭიროა“,- ასეთი იყო სტატუსი სოციალურ ქსელში, რომელიც მოქალაქემ თავის გვერდზე დაწერა და ქალაქის მერი და ქალაქის მერიის ოფიციალური გვერდები მონიშნა.
როგორც „თაიმერთან“ საუბარში გიორგი ყურაშვილი ყვება, სტატუსის დაწერიდან რამდენიმე საათში მას თავად მერმა უპასუხა და მისამართის დაზუსტება მოსთხოვა. კიდევ რამდენიმე საათის გასვლის შემდეგ კი ურნა უკვე შეცვლილი და მერისგან მიღებული მადლობაც დახვდა გიორგის სოციალურ ქსელში.
„გიორგი თქვენს მიერ მითითებულ მისამართზე, „თბილსერვის ჯგუფმა“ მოახდინა სათანადო რეაგირება და ურნა უკვე შეცვლილია. მადლობა აქტიურობისთვის“,- აღნიშნულია ქალაქ მერის მიერ გამოგზავნილ პასუხში.
