მიხეილ მაჭავარიანი – საწვავის ღირებულება ბარელი ნავთობის ფასთან მიმართებაში, სრულიად არაადეკვატურია

“ერთიანი ნაციონალური მოძრაობის” წევრის, დეპუტატ მიხეილ მაჭავარიანის განცხადებით, დღეის მდგომარეობით საწვავის ღირებულება, ბარელი ნავთობის ფასთან მიმართებაში , სრულიად არაადეკვატურია. დღეს გამართულ პრესკონფერენციაზე მიხეილ მაჭავარიანმა ნავთობროდუქტებზე ფასების მატებასთან დაკავშირებით ისაუბრა.
“ნაციონალური მოძრაობის” ინფორმაციით, დეპუტატმა მთავრობას წინასაარჩევნო სპეკულაციები გაახსენა, როცა ისინი “ნაციონალური მოძრაობის” მთავრობის წევრების ნავთობროდუქტებიდან მიღებული მოგების შესახებ საუბროდნენ.
“მინდა შევეხო საკითხს, რომელიც ნავთობპროდუქტების ფასებს უკავშირდება. თქვენ გახსოვთ ნავთობის ფასებთან დაკავშირებით დღევანდელი ხელისუფლების სპეკულაციები, ტყუილები, როდესაც ისინი მოსახლეობას ნავთობზე ფასის გაიაფებას ჰპირდებოდნენ. საუბრობდნენ რაღაც აბსურდულ 1 ლარზე, რომელიც თითქოსდა ყოფილი ხელისუფლების წარმომადგენლების ჯიბეებში მიდიოდა. განვლილმა სამმა წელმა საპირისპირო დაგვანახა – რომ ეს იყო ტყუილი, მაგრამ ამ უნიათო ხელისუფლებას ამის აღიარება არ შეუძლია. ისევე როგორც იმის ახსნა, თუ რასთან გვაქვს საქმე”, -განაცხადა მიხეილ მაჭავარიანმა.
დეპუტატმა ისაუბრა კონკრეტულ ციფრებზე და აღნიშნა, რომ ნავთობის მსოფლიო ფასი არის კორელაციაში დღევანდელ ფასებთან ჩვენს ბენზინგასამართ სადგურებზე.
“მინდა აღვნიშნო, რომ მიმდინარე წლის 17 მაისამდე ავტოგაზის ღირებულება შეადგენდა 1,13 – 1,15 ლარის ფარგლებში, სამწუხაროდ, დღეის მდგომარეობით, ის გაძვირდა და 1,23 – 1,25 ლარია. ასევე, გაძვირდა ბენზინი და არის არაადეკვატური იმ ფასისა, რა ფასიც ბარელი ნავთობი ღირს. 2009 წლის ივნისის თვეში, როდესაც ბარელი ნავთობი ღირდა 68 დოლარი, საქართველოს ბენზინ გასამართ სადგურებზე 1 ლიტრი ბენზინის ღირებულება შეადგენდა: პრემიუმი – 1,37 ლარს; რეგულარი – 1,28 ლარს; დიზელი – 1,15 ლარს; დღეს, როდესაც ნავთობის ფასი მსოფლიო ბაზარზე ღირს იგივე 68 დოლარი, ბენზინი ფასი შეადგენს : პრემიუმი – 2,04 ლარს; რეგულარი 1,91 ლარს; დიზელი – 2,02 ლარს;
ვთხოვ საქართველოს უნიათო პრემიერ-მინისტრს და კალაძეს, აუხსნან მოსახლეობას, თუ ასეთი ფაქტი დასაშვებია, მაშინ რატომ არის ეს ერთლარიანი სხვაობა და ვის ჯიბეში მიდის აღნიშნული თანხა – მთავრობის, ბენზინის იმპორტიორების თუ რომელიმე კონკრეტული ადამიანის? აქ საუბარია არა ვირტუალურ ერთ ლარზე, რომლის ,,მოპარვასაც” ისინი გვაბრალებდნენ, არამედ კონკრეტულ მონაცემზე – 2009 წელს, როდესაც ბარელი ნავთობის ღირებულება 68 დოლარს, ხოლო ბენზინი 1,37 შეადგენდა, ახლა იგივე 68 დოლარის პირობებში რატომ ღირს 2, 04 ლარი?”, – განაცხადა მიხეილ მაჭავარიანმა.

banner
წინა სტატიაშიგიორგი მარგველაშვილი – ევროპის უსაფრთხოება აღმოსავლეთ პარტნიორობის ქვეყნების უსაფრთხოების გარეშე ილუზიაა
შემდეგი სტატიანატო-ს საპარლამენტო ასამბლეა საქართველოსთვის MAP-ის მინიჭების მოწოდებით გამოდის