სანქციასთან დაკავშირებით შარშანდელი გადაწყვეტილება გაგრძელდა და ახალი არაფერი მომხდარა, – ამის შესახებ რუსეთთან ურთიერთობების საკითხებში ჟურნალისტებს საქართველოს პრემიერ-მინისტრის სპეციალურმა წარმომადგენელმა, ზურაბ აბაშიძემ განუცხადა.
“მოგეხსენებათ, ევროკავშირის საბჭოს მიერ, უკრაინის მოვლენების გამო, რუსეთის მიმართ სხვადასხვა დროს 12 სხვადასხვა სახის სანქცია დაწესდა. საქართველო გასული წლის 23 ივნისს მიუერთდა ერთ სანქციას – ყირიმსა და სევასტოპოლში (უკრაინა) წარმოებულ საქონელზე ექსპორტის კუთხით. ამჟამად, 19 ივნისს მოხდა აღნიშნული გადაწყვეტილების გაგრძელება ავტომატურ რეჟიმში, კიდევ ერთი წლით. საქართველოს მხრიდან რაიმე ახალ გადაწყვეტილებაზე საუბარი არ არის”, – განაცხადა აბაშიძემ.
რაც შეეხება ოპონენტების კრიტიკას, რომ საქართველო არ უერთდება მთელ რიგ ეკონომიკურ საქნციებს რუსეთის წინააღმდეგ, აბაშიძე აცხადებს, რომ ჩვენ დიპლომატიური ურთიერთობებიც კი არ გვაქს რუსეთთან და ამაზე მაღალი სანქცია არ არსებობს.
ევროპული საბჭოს ვებგვერდზე გამოქვეყნებულ დეკლარაციაში კი აღნიშნულია, 2015 წლის 19 ივნისს საბჭომ მიიღო გადაწყვეტილება #2015/959, რომლის მიხედვითაც, ყირიმისა და სევასტოპოლის ანექსიასთან დაკავშირებით არსებული ზომები 2016 წლის 23 ივნისამდე შენარჩუნდება. დეკლარაციას უერთდებიან კანდიდატი ქვეყნები მონტენეგრო და ალბანეთი, EFTA-ს ქვეყნები – ისლანდია, ლიხტენშტეინი და ნორვეგია, აგრეთვე საქართველო და უკრაინა.
