საპარლამენტო ფრაქცია “ქართული ოცნების” წევრ ზვიად კვაჭანტირაძის აზრით, პარლამენტში პრეზიდენტის ყოველწლიური ანგარიშით გამოსვლა დებატების ფორმატში არ უნდა წარიმართოს.
“პრეზიდენტი დღეს სხვა ფუნქციებით მოქმედებს. შეიძლება პოლიტიკური დებატები პრემიერ-მინისტრის გამოსვლას მოჰყვეს, მაგრამ პრეზიდენტის გამოსვლაზე დებატების გამართვა საჭიროდ არ მიმაჩნია”, – განუცხადა ჟურნალისტებს ზვიად კვაჭანტირაძემ.
ამ წუთებში “ქართული ოცნების” ცენტრალურ ოფისში ფრაქციის სხდომა მიმდინარეობს. როგორც სხდომის დაწყების წინ აღინიშნა, განხილვის ერთ-ერთი თემა პრეზიდენტის ყოველწლიური ანგარიშით გამოსვლის ფორმატი იქნება. ფრაქციის წევრები პარლამენტში განსახილველ საკითხებზე პოზიციების შეჯერებას გეგმავენ.