დიდი შვიდეულის ქვეყნები მომავალ კვირაში დაგეგმილ სამიტზე რუსეთის წინააღმდეგ ახალი სანქციების დაწესების საკითხს განიხილავენ.
თეთრი სახლის პრესმდივნის, ჯოშ ერნესტის, თქმით, მოსკოვი უკრაინის ტერიტორიული მთლიანობის დარღვევის გამო საფასურს მომავალშიც გადაიხდის.
სამიტის წინ პოზიციები უკვე შეაჯერეს ოფიციალურმა კიევმა და ბერლინმა.
პეტრე პოროშენკომ კიევში გერმანიის საგარეო საქმეთა მინისტრი, ფრანკ ვალტერ შტაინმაიერი, მიიღო.
პარალელურად სატელეფონო საუბარი შედგა ვლადიმერ პუტინს, ანგელა მერკელსა და ფრანსუა ოლანდს შორის.
ლიდერებმა დონბასში არსებული ვითარება განიხილეს და მინსკის შეთანხმების აუცილებლობაზე ისაუბრეს. სწორედ მინსკის შეთანხმების სრულ რეალიზებას ასახელებს ევროკავშირი მოსკოვის წინააღმდეგ დაწესებული სანქციების მოხსნის პირობად.
