საპარლამენტო უმრავლესობის ლიდერი, დავით საგანელიძე საჰაერო უსართხოებასთან დაკავშირებული მემორანდუმის საკითხზე დროებითი საპარლამენტო კომისიის შექმნის წინააღმდეგია.
როგორც საგანელიძემ ჟურნალისტებს “თავისუფალი დემოკრატების” მოთხოვნის კომენტირებისას განუცხადა, არასწორად მიაჩნია ყველა იმ საკითხზე კომისიის შექმნა, რომელსაც ოპოზიცია წამოჭრის. უმრავლესობის ლიდერის განმარტებით, ასეთ შემთხვევაში პარლამენტი დროებითი კომისიების “გაუთავებელ და უსასრულო კასკადს მიიღებს”.
“მე არა მგონია, რომ ყველა საკითხზე, რასაც ოპოზიცია წამოჭრის, პარლამენტმა სასწრაფოდ კომისიები უნდა შექმნას. ამ შემთხვევაში მივიღებთ კომისიების უსასრულო და გაუთავებელ კასკადს, რაც წარმოუდგენელია. რაც შეეხება უშუალოდ იმ თემას, რაზეც “თავისუფალი დემოკრატები” საუბრობენ, მიმაჩნია, რომ ეს საკითხი არ არის ის, რომელზეც ახლა კომისია უნდა შეიქმნას. თუ სასაუბრო და სალაპარაკო იყო ეს თემა, კომისია თავის დროზე უნდა შექმნილიყო და არა მაშინ, როცა სხვა პროცესებს უკავშირდება ეს ყველაფერი. ასე რომ, ჩემი აზრით, ასეთი კომისია არ უნდა შეიქმნას, ამის მომხრე არ ვარ და დარწმუნებული ვარ, არ შეიქმნება”, – განაცხადა საგანელიძემ.
საპარლამენტო უმრავლესობის ლიდერის თქმით, “თავისუფალი დემოკრატების” მოთხოვნაზე კოალიცია “ქართული ოცნების” პოლიტსაბჭოს დღევანდელ სხდომაზე საუბარი არ ყოფილა.
“ამ თემასთან დაკავშირებით არ გვისაუბრია. როცა საკითხის ინიცირება მოხდება, პარლამენტი მერე უპასუხებს მას იმ პოზიციით, რა პოზიციაც იქნება ფრაქციებზე შეთანხმებული”, – აღნიშნა დავით საგანელიძემ.
