ქალაქის მერის განცხადებით, მომდევნო კვირიდან თბილისში სამუშაოები 8 ქუჩაზე დაიწყება.
დავით ნარმანიამ დღეს გზების რეაბილიტაციის სამუშაოების დაგვიანების მიზეზები განმარტა, რითაც ნაციონალური მოძრაობის დღევანდელ აქციის მონაწილეებს პასუხი გასცა.
„მომდევნო კვირას უკვე იწყება 4 მილიონის ღირებულების საგზაო სამუშაოები. გამომდინარე იქიდან, რომ ერთ-ერთ ტენდერში 2 კომპანიამ უჩივლა ერთმანეთს და, შესაბამისად, ამის განხილვა მიმდინარეობდა სასამართლოში და დაახლოებით 3 კვირით დაიგვიანა სამუშაოების დაწყებამ. თუმცა, ახლა უკვე ბოლო სტადიაა. დაკონტრაქტდება გამარჯვებული კომპანია და დაიწყებს სამუშაოებს,“ – განაცხადა დავით ნარმანიამ.
თბილისის მერს გზების რეაბილიტაციისკენ “ნაციონალურმა მოძრაობამ” დღეს კიდევ ერთხელ მოუწოდა. საკრებულოს დეპუტატებმა და არასამთავრობოებმა აქცია პერფორმანსი თევდორე მღვდლის ქუჩაზე მოაწყვეს.
