თუ მუდმივად დავკავდებით ოპონენტების მიმართ პასუხით, ჩვენი ქვეყნის საქმეს წინ ვერ წავწევთ, – ამის შესახებ საპარლამენტო უმრავლესობის წევრმა გია ჟორჟოლიანმა პარლამენტის პლენარულ სხდომაზე განაცხადა.
“ინტენსიური წელი გველის. ნათელია, რომ ეს წელი კიდევ უფრო გაამწვავებს დისკუსიას. მგონია, რომ ჩვენ, ვისაც პასუხისმგებლობა გვეკისრება ქვეყანაში მიმდინარე პროცესებზე, კარგად უნდა გავაცნობიეროთ ის, რომ თუ დავკავდებით მუდმივად პასუხით იმ ოპონენტების მიმართ, რომლებიც მუდმივად იმეორებენ, რომ ყველაფერი ცუდად არის, ივანიშვილი დამნაშავეა და ა.შ. და ჩვენ ვუპასუხებთ, რომ ყველაფერი კარგადაა, ამით ჩვენ, ჩვენი ქვეყნის საქმეს წინ ვერ წავწევთ. ის, რომ ყველაფერი არ არის ცუდად და ბევრი რამე გაკეთდა – თავისუფლება, დემოკრატია, მათ შორის, სოციალური პოლიტიკა, ამას დისკუსია არ სჭირდება. ეს ხალხმაც იცის და ყველა ობიექტურმა დამკვირებელმაც. ჩვენი მთავარი ამოცანა უნდა იყოს მართლაც რეალურად იმ ხარვეზების აღმოფხვრა, რომელიც ერთი მხრივ, შედეგია წინა წლებში ჩამოყალიბებული წესრიგისა (არა მხოლოდ “ნაციონალური მოძრაობის” დროს, თუმცა განსაკუთრებით მათი ხელისუფლებაში ყოფნის პერიოდში) და ჩვენ ეს წესრიგი უნდა შევცვალოთ. პირველ რიგში, ეკონომიკაში, უპასუხისმგებლო მმართველობიდან უნდა გადავიდეთ პასუხისმგებელ მმართველობაზე და ამ მიმართულებით ეს ხარვეზები, რომლებიც ინერციით მოდის, უნდა აღმოვფხვრათ”, – განაცხადა ჟორჟოლიანმა.
დეპუტატმა მოუწოდა მედიას გააშუქოს, რა ხდება ხდება მსოფლიოსა და რეგიონულ ეკონომიკაში.
“რაც შეეხება საქართველოს ეკონომიკის ტრაგიკულ სურათს, მე მოვუწოდებდი მედიას, იქნებ გააშუქოს რა ხდება მსოფლიოსა და რეგიონულ ეკონომიკაში. რა მდგომარეობაშია. ე.ი. უნდა გადადგნენ ყაზახეთის, აზერბაიჯანის, უკრაინის მთავრობები, რომელიც გნებავთ და რამდენიც გნებავთ”, – განაცხადა ჟორჟოლიანმა.
