გედევან ფოფხაძე – რიგგარეშე სხდომის დანიშვნით, პრეზიდენტმა “ნაცმოძრაობის” ინტერესებს გაუწია ანგარიში

საპარლამენტო უმრავლესობის წარმომადგენლის, გედევან ფოფხაძის შეფასებით, პარლამენტის რიგგარეშე სხდომის დანიშვნით პრეზიდენტმა ნებსით თუ უნებლიეთ, “ნაციონალური მოძრაობის” პოლიტიკურ და პარტიულ ინტერესებს გაუწია ანგარიში.
როგორც ფოფხაძემ ჟურნალისტებთან საუბრისას აღნიშნა, ეკონომიკური თემებით მანიპულირება და პოლიტიკური ტემპერატურის აწევის მცდელობა არასწორია.
“ვფიქრობ, ეკონომიკურ-ფინანსურ საკითხებთან დაკავშირებით პარლამენტში დანიშნული რიგგარეშე სხდომა და დებატები ემსახურება არა პრობლემის გადაჭრის მიზანს, არამედ “ნაციონალური მოძრაობის” მიერ 21 მარტისთვის დანიშნული აქციის წინ პოლიტიკური ტემპერატურის აწევას”, – აცხადებს გედევან ფოფხაძე.
თავად დეპუტატი 13 მარტის რიგგარეშე სხდომაში მონაწილეობის მიღებას არ აპირებს.
საქართველოს პრეზიდენტმა, გიორგი მარგველაშვილმა პარლამენტის რიგგარეშე სხდომა 13 მარტს დანიშნა. ამის შესახებ ნათქვამია საქართველოს პრეზიდენტის განკარგულებაში, რომელიც პრეზიდენტის ადმინისტრაციის ვებგვერდზე გავრცელდა.
“საქართველოს პრეზიდენტის განკარგულებით, საქართველოს კონსტიტუციის 61-ე მუხლის მე-2 პუნქტის შესაბამისად, საქართველოს პარლამენტის რიგგარეშე სხდომა 2015 წლის 13 მარტის 12 საათიდან დაინიშნა. განკარგულების მიხედვით პარლამენტის რიგგარეშე სხდომაზე განსახილველი საკითხია: ეროვნული ვალუტის, ლარის კურსის სტაბილიზაციისკენ მიმართული ღონისძიებები”, – ნათქვამია პრეზიდენტის განკარგულებაში.

banner
წინა სტატიაშიმოსკოვის მუზეუმში აყვანილი მძევლი და მოძალადე ყოფილი ცოლ-ქმარი აღმოჩნდა
შემდეგი სტატიაზურაბ მელიქიშვილი: როდესაც მთავრობა არ ენახვება ხალხს ხალხი დაენახვება მას 21 მარტს