გამოცდების ეროვნული ცენტრის ხელმძღვანელმა მაია მიმინოშვილმა მედიას ქართული ენისა და ლიტერატურის გამოცდის მეორე ეტაპის მიმდინარეობის შესახებ ბოლო ინფორმაცია გააცნო.
მიმინოშვილის თქმით, გამოცდის მეორე სესიაზე 9 282 უნდა გამოცხადებულიყო, თუმცა მთელი საქართველოს მასშტაბით, 300 არ გამოცხადდა რაც საერთო აბიტურიენტების რაოდენობის დაახლოებით 3%-ია.
„ერთი საათია მიმდინარეობს პროცესი. ყველაფერი წყნარად და მშვიდად არის. იმედი მაქვს, დღევანდელი დღე ასე დამთავრდება. რაც შეეხება დაგვიანებებს, ის არ ყოფილა. დარღვევების გამო არცერთი აბიტურიენტი არ მოხსნილა გამოცდიდან. იყო 2 შემთხვევა – გორში გამოცხადდა აბიტურიენტი, რომელიც თბილისში იყო განაწილებული. ჩვენმა თანამშრომლებმა ოპერატიულად მოახერხეს ამ აბიტურიენტის მანქანაში ჩასმა და საბედნიეროდ, თბილისის საგამოცდო ცენტრში მისვლა მოასწრო. კიდევ ერთი შემთხვევა იყო – აბიტურიენტი თელავში გამოცხადდა და ისიც თბილისში იყო განაწილებული. საუბედუროდ, მას ვერაფრით დავეხმარებოდით, ვერ მოასწრებდა თბილისში ერთ საათში ჩამოსვლას. ამ აბიტურიენტს არ გამოცხადება ჩაუწერეს“, – განაცხადა მიმინოშვილმა.
ქართულ ენასა და ლიტერატურაში ერთიანი ეროვნული გამოცდების მეორე ეტაპი 15:00 საათზე დაიწყო. ის 4 საათს გაგრძელდება. დღეს სულ 20 ათასამდე აბიტურიენტი აბარებს ერთიან ეროვნულ გამოცდებს. ამავე რაოდენობის აბიტურიენტს ელოდებიან ხვალინდელ გამოცდაზე, რომელიც კვლავ ქართულ ენასა და ლიტერატურაში იქნება.